ഹാട്രിക് ലോകകപ്പ് ഫൈനൽ എന്ന ഫ്രാൻസിന്റെ സ്വപ്നം തകർത്ത് സ്പെയിൻ കലാശപ്പോരിലേക്ക്. ഡാലസ് സ്റ്റേഡിയത്തിൽ നടന്ന ആവേശകരമായ രണ്ടാം സെമിഫൈനലിൽ എതിരില്ലാത്ത രണ്ട് ഗോളുകൾക്കാണ് യൂറോപ്യൻ വമ്പൻമാരായ ഫ്രാൻസിനെ സ്പെയിൻ വീഴ്ത്തിയത്. പന്തടക്കത്തിലും ആക്രമണത്തിലും പ്രതിരോധത്തിലും സമ്പൂർണ ആധിപത്യം പുലർത്തിയ സ്പാനിഷ് സംഘം മത്സരത്തിലുടനീളം എതിരാളികൾക്ക് കാര്യമായ അവസരങ്ങളൊന്നും അനുവദിച്ചില്ല.
22-ാം മിനിറ്റിൽ ലഭിച്ച പെനാൽറ്റി മൈക്കൽ ഒയർസാബൽ ലക്ഷ്യത്തിലെത്തിച്ചതോടെയാണ് സ്പെയിൻ ലീഡെടുത്തത്. ഫ്രഞ്ച് പ്രതിരോധ താരം ലൂക്കാസ് ഡിഗ്നെയുടെ ഫൗളിൽ ലാമിൻ യമാൽ വീണതിനെ തുടർന്നാണ് റഫറി പെനാൽറ്റി അനുവദിച്ചത്. ഗോൾകീപ്പർ മൈക്ക് മെയ്ഗനൻ ശരിയായ ദിശയിലേക്ക് ഡൈവ് ചെയ്തെങ്കിലും ഒയർസാബലിന്റെ ശക്തമായ ഷോട്ട് തടയാനായില്ല.
ലീഡ് നേടിയ ശേഷവും സ്പെയിൻ ആക്രമണത്തിന്റെ മൂർച്ച കുറച്ചില്ല. ഫ്രാൻസ് തിരിച്ചുവരവിനായി ശ്രമിച്ചെങ്കിലും മധ്യനിരയിലും പ്രതിരോധത്തിലും സ്പാനിഷ് താരങ്ങൾ ഉറച്ചുനിന്നു. കിലിയൻ എംബാപ്പെയെ ഫലപ്രദമായി പൂട്ടിയ പ്രതിരോധം ഫ്രാൻസിന്റെ മുന്നേറ്റങ്ങളെ ഒന്നൊന്നായി വിഫലമാക്കി.
58-ാം മിനിറ്റിൽ ഡാനി ഒൽമോയുമായി നടത്തിയ മികച്ച നീക്കത്തിനൊടുവിൽ വലതു വിങ്ങിലൂടെ കുതിച്ചെത്തിയ പെഡ്രോ പോറോയുടെ തകർപ്പൻ ഫിനിഷ് സ്പെയിന്റെ ലീഡ് ഇരട്ടിയാക്കി. തുടർന്ന് മത്സരം പൂർണമായും സ്പാനിഷ് ടീമിന്റെ നിയന്ത്രണത്തിലായി.
ആദ്യ പകുതിയിൽ തന്നെ കൂടുതൽ പന്തടക്കവും വ്യക്തമായ അവസരങ്ങളും സൃഷ്ടിച്ച സ്പെയിൻ രണ്ടാം പകുതിയിലും അതേ താളം തുടർന്നു. മറുവശത്ത്, ടൂർണമെന്റിൽ ഇതുവരെ ശ്രദ്ധേയ പ്രകടനം നടത്തിയ ഫ്രാൻസ് സെമിയിൽ നിറംമങ്ങിയ കാഴ്ചയാണ് സമ്മാനിച്ചത്. ഗോൾകീപ്പർ ഉനായ് സിമോണിനെ ഗൗരവമായി പരീക്ഷിക്കുന്ന ഒരു അവസരം പോലും ഫ്രഞ്ച് മുന്നേറ്റനിരയ്ക്ക് സൃഷ്ടിക്കാനായില്ല.
2010-ൽ ദക്ഷിണാഫ്രിക്കയിൽ ലോകകിരീടം നേടിയ ശേഷം ആദ്യമായാണ് സ്പെയിൻ വീണ്ടും ലോകകപ്പ് ഫൈനലിൽ എത്തുന്നത്. മറ്റൊരു സെമിയിൽ അർജന്റീനയും ഇംഗ്ലണ്ടും തമ്മിലുള്ള പോരാട്ടത്തിലെ വിജയികളെയാണ് സ്പാനിഷ് പട കലാശപ്പോരിൽ നേരിടുക.
സെമിയിലെ ഈ ആധികാരിക വിജയത്തോടെ ലോക ഫുട്ബോളിലെ തങ്ങളുടെ സുവർണകാലം തിരിച്ചുപിടിക്കാനുള്ള ശക്തമായ സന്ദേശമാണ് ലാ റോഹ ലോകത്തിന് മുന്നിൽ നൽകിയത്.
Tags:
SPORTS
