ഗിന്നസ് എന്ന മദ്യനിർമാണകമ്പനിയുടെ മാനേജിങ് ഡയറക്ടർ ആയിരുന്ന ഹ്യൂ ബീവറാണ് ലോക റെക്കോർഡുകൾ രേഖപ്പെടുത്താനൊരു പുസ്തകം എന്ന ആശയം ആദ്യമായി മുന്നോട്ടുവയ്ക്കുന്നത്. ഒരിക്കൽ വേട്ടയ്ക്കിറങ്ങിയ ഹ്യൂ ബീവർ പൊൻമണൽക്കോഴിയെ (Golden Plover) വെടിവച്ചിടാൻ ശ്രമിച്ചു. എന്നാൽ ആ പക്ഷി പറന്നുരക്ഷപ്പെട്ടു. പക്ഷിയുടെ വേഗം കണ്ട ബീവറുടെ മനസ്സിലൊരു ചോദ്യമുയർന്നുവന്നു. യൂറോപ്പിലെ ഏറ്റവും വേഗക്കാരനായ പക്ഷി ഏതാണ്? തന്റെ പക്കലുള്ള റഫറൻസ് ഗ്രന്ഥങ്ങളെല്ലാം പരതിയിട്ടും ബീവറിനു കൃത്യമായ ഉത്തരം കണ്ടെത്താൻ കഴിഞ്ഞില്ല. ഇങ്ങനെയുള്ള അനവധി ചോദ്യങ്ങളുണ്ടെന്നും അവയ്ക്ക് ഉത്തരം നൽകുന്ന ഒരൊറ്റ പുസ്തകമിറക്കിയാൽ അതിനു സ്വീകാര്യത കിട്ടുമെന്ന തിരിച്ചറിവിൽ നിന്നാണ് ഗിന്നസ് ലോകറെക്കോർഡുകൾ പിറക്കുന്നത്.
