ഇരുടീമുകളും ഗോള്‍രഹിത സമനില പാലിച്ചു. ഇതോടെ സീസണിലെ ആദ്യ വിജയത്തിനായി ഈസ്റ്റ് ബംഗാള്‍ ഇനിയും കാത്തിരിക്കണം. ഈ സമനിലയോടെ മുംബൈ പോയന്റ് പട്ടികയില്‍ ഒന്നാം സ്ഥാനം തിരിച്ചുപിടിച്ചു. വീണ്ടും സമനില വഴങ്ങിയതോടെ ഈസ്റ്റ് ബംഗാള്‍ അവസാന സ്ഥാനത്തുതന്നെ തുടരുന്നു.
10 മത്സരങ്ങളില്‍ നിന്ന് അഞ്ച് വിജയവും രണ്ട് സമനിലയും മൂന്ന് തോല്‍വിയുമടക്കം 17 പോയന്റാണ് മുംബൈയുടെ അക്കൗണ്ടിലുള്ളത്. ഇത്രയും മത്സരങ്ങളില്‍ നിന്ന് ആറ് സമനിലയും നാല് തോല്‍വിയുമുള്ള ഈസ്റ്റ് ബംഗാളിന് വെറും ആറ് പോയന്റാണ് ഇതുവരെ നേടാനായത്.
മിന്നല്‍ ആക്രമണം നടത്തുന്ന മുംബൈ സിറ്റിയെ സമനിലയില്‍ തളച്ചതില്‍ ഈസ്റ്റ് ബംഗാളിന് അഭിമാനിക്കാം. അനായാസ വിജയം പ്രതീക്ഷിച്ച് കളിക്കാനിറങ്ങിയ മുംബൈ സിറ്റിയെ വരിഞ്ഞുമുറുക്കാന്‍ ഈസ്റ്റ് ബംഗാളിന് സാധിച്ചു. ഗോള്‍കീപ്പര്‍ അരിന്ദം ഭട്ടാചാര്യയുടെ മിന്നല്‍ സേവുകളാണ് ഈസ്റ്റ് ബംഗാളിന് തുണയായത്. മികച്ച പ്രകടനം പുറത്തെടുത്ത ഈസ്റ്റ് ബംഗാള്‍ പ്രതിരോധവും സമനില നേടുന്നതില്‍ നിര്‍ണായക പങ്കുവഹിച്ചു.
അഹമ്മദ് ജാഹുവും ഇഗോര്‍ അംഗൂളോയും ക്യാസീന്യോയും ബിപിന്‍ സിങ്ങുമെല്ലാം അണിനിരന്ന മുംബൈ മുന്നേറ്റനിരയെ നന്നായി തന്നെ നേരിടാന്‍ ഈസ്റ്റ് ബംഗാളിന് സാധിച്ചു. പക്ഷേ ഫോം കണ്ടെത്താത്ത മുന്നേറ്റനിരയാണ് ടീമിന്റെ തലവേദന. മുംബൈയ്‌ക്കെതിരായ മത്സരത്തില്‍ ഈസ്റ്റ് ബംഗാളിന്റെ ആക്രമണങ്ങളെല്ലാം ദുര്‍ബലമായിരുന്നു
Tags:
SPORTS
